W naszej chałpie jest dycki coś do zmaszkecynio. Bombony w kożdej zorcie, skryte w byfyju i szranczku, czekajom na skosztowani. Ale od małego bajtla ciągnie sie za mnom smak oblata. Piyrwej piykli je Oma, a po tym mamulka, bo nom smakowały. Mom taki zdjynci, na kierym siedza na ryczce, pokazuja dwa mlyczoki, a w rynce trzimia ugryziony wafel. Nasza Oma nos nie głoskali, ale przoli nom fest, toż też umyślili se, że zrobiom do nos, bajtli, taki mały oblatek, gynał pasowny do małych ronk i gymbow. Dycki jak nom dowali tyn maszket, to godali: „mosz deklika”. Do dzisioj nasza Starka majom zrobionych pora deklikow na forant, ekstra do nos, choć trocha my urośli.
