Bywało, że niedzielne łobiady jedlimy u Omy i Opy. Obowionzkowo o dwanastej w połednie, po sumie. Wiycie, jak na Ślonsku wyglondoł niedzielny łobiod? Musiała być zupa z nudlami i drugi dani, czyli kluski, modro kapusta i rolada. Starka szykowali sie zawsze trocha pryndzyj na niedziela – już w sobota rychtowali rolady, kulali kluski, a jeszcze pora dni pryndzyj robili nudle. I właśnie te swojskie, prawdziwe nudle pamiyntom tak dobrze. Najsomprzód Oma wyrobiali ciasto, po tym je musieli fest rozkulać nudelkulom, tak, żeby przez nie było widać zygor na kościele. Taki placki rozkłodali do wysuszynio po całej izbie, kaj yno sie dało. Na szezlongach, stołach, stołkach, szranczkach i komodach poukłodane były płócienne serwety, a na nich rozkulane ciasto. Pamiyntom, że wyciepowali nos potym z chałpy i nie moglimy włazić do izbów, kaj były nudle, żeby nic nie poniszczyć z tej misternej roboty. A my i tak jakimś sposobym jedyn placek porwali i na surowo zmaszkecili. Przeschniynte nudle Starka kroli na ciynkie poski, a te na drobne nudelki. Jaki ci to było dobre w niedzielnej zupie!
